حضرات السادة الاخوان... عيشو بشرف

من اول يوم في الثورة والاخوان مواقفهم في شدة الغرابة ومحيرة.... وكان الجميع حتى اثناء وجودهم معانا في الميدان (بعد ما كانو في الاول معترضين على مظاهرات 25 يناير واصدروا بيان يوم 24 بيؤكد ده وعصام العريان صرح بده بنفسه ونزلو يوم 28 لما اتاكدو ان التغيير قادم )كنا عارفيين انهم اول ناس هيلتفو على الثورة لصالح مصالحهم الشخصية... وكانت بتتردد جمل كتير قوي كانت بتثير قلقي وخوفي منهم" هما معانا المرحلة ديه بس مش هيبقو معانا بعد كده" او " هيكسبونا الجولة ديه بس هيسيبوك الجولة اللي وراها" واللي اكد لنا الموضوع ده طلبهم يوم السبت 12 فبراير بعد جمعة التنحي من المجلس العسكري تسليم السلطة ليهم لأنهم التنظيم الوحيد على الساحة القادر على حكم البلاد في المرحلة ديه .. بكل سهولة ودون التفات لإرادة شعب او انتخابات يطلبو انهم يقفذوا على السلطة بعد ثورة بتنادي بالحرية والانتخابات النزيهة وتداول السلطة عن طريق الاقتراع.الحر النزيه, وجه بعدها عقد زواج اتضح انه عرفي بينهم وبين المجلس العسكري اثناء الاستفتاء العجيب اللي تم في 19 مارس وتحالفهم لفترة وجيزة مع المجلس والسلفيين عشان الناس تقول نعم للدستور واللي الايام انهت هذا التحالف لأن المصالح الشخصية تحكم..... ووراها جمعة الوقيعة اللي اطلقها موقع الاخوان على جمعة 27 مايو اللي اشاروا انها هتكون للوقيعة بين الشعب والجيش... والتاريخ بيثبت كذب حدسهم وان المليونية عدت بسلام شديد وكانت من اهم الجمعات في عمر الثورة ثم يصفنا عصام العريان بان من في التحرير في اعتصام  يوليو ليسو هم الثوار الحقيقين وان الاعتصام ده حالة شاذة ..... وفي اثناء كل تلك الاحداث رأينا شباب الاخوان ينشقو على مكتب الارشاد لكي يقفو بجوار الثورة ومع شبابها لإنهم لا يرضون على انفسهم ان يلتفوعلى حق من حقوق الشعب لمصالح شخصية وحاليا بعد تأسيسهم لحزب الحرية والعدالة منتشرين في الشوارع  بيوزعوا هدايا في حملاتهم الانتخابية وزيت وسكر وشولة رز.. ينظمو المرور في الشوارع .. مجمعات صحية في كل حتة وخدمات عشان يغرو بيها عين المواطن البسيط عشان ينتخبهم.... كمية المؤتمرات اللي بنشوف فيها دعاية فظيعة وغير مبررة لناس المفروض عايزة تخدم اهل بلدها ولا هو حب الناس بالفلوس؟؟؟؟ الفلوس اللي فعلا مش معروف مصدرها لحد النهاردة فعلا منين؟ في اتهامات موجهة من قبل العديد لحركة 6 ابريل بالعمالة والتمويل الخارجي رغم امكانيتهم الضئيلة واللي واضحة وضوح الشمس.. طيب كمية الفلوس اللي عمالة تتبعتر ديه يمين وشمال منين؟ ما الاخوان مهماش مليارديرات للدرجة واحنا مش واخدين بالنا .. بيتجيبو فلوسكو منين... ؟؟ ده مش اتهام... بس عليكو انكو تقولو مصادر فلوسكو منين...؟ اصل محدش بيرمي فلوسو في الارض بالمنظر ده الا لو مكنش تعبان فيها.... حضرات السادة الاخوان...... نحن لسنا بحاجة اليكم في هذه المرحلة تماما فنحن نعرف انكم سوف تاخذونا الى طريق لا نريده ولكن الي ما انتم تريدوه .. وهذ هو اكبر التفاف على ثورة الشعب.. لن نسبتدل ارادة شعب بإرادة مكتب الارشاد.. لن نستبدل لجنة سياسات بمكتب ارشاد لن نستبدل الحزب الوطني بالأخوان المسلمون... حضرات السادة الاخوان.. عيشو بشرف. 

صفحة كريم مغاوري الرسمية على الفيس بوك (Like )

https://www.facebook.com/karimmaghawry25

حساب كريم مغاوري على تويتر ( Follow )

https://twitter.com/#!/KarimMaghawry1

قناة كريم مغاوري على اليويتوب ( Subscribe  )

http://www.youtube.com/user/Karimchata

مدونة كريم مغاوري ( عدسة كريم مغاوري)- (Join)

http://karimmaghawry.blogspot.com/