لا للمحاكمات العسكرية للمدنيين

مع كل طلعة شمس اصحى من النوم اشوف اذا كنت نايم على سريري ولا نايم على الارض في زنزانة بتهمة اني بقول رأيي في المجلس العسكري , بس طبعا التهمة اللي هتتوجهلي اني بتتطاول على الذات العسكرية العليا.. اللي هي انزلت علينا من السما السابعة للأرض ... طيب وهي الذات العسكرية ديه فعلا انزلت علينا ولا ايه الحكاية؟ هو اني انتقد المجلس العسكري اللي ف منصب سياسي ديه بقت جريمة او تطاول؟.. ولا اعضاء المجلس كل ارائهم صائبة ومبيغلطوش وقرارتهم بيجتمع عليها الشعب كله واللي بيعترضو دول الناس اللي عايزة تبوظ وتخرب البلد وعملا وبياخدو فلوس من برا؟؟؟ كتير من الشخصيات البارزة المعروفة انتقدو المجلس العسكري وتاني يوم اتبعتلهم عشان يتحقق معاهم.. ريم ماجد وحسام الحملاوي ونبيل شرف الدين مثلا كانو بينتقدو تصرفات الشرطة العسكرية وانتهاكتهم للمتظاهرين في 9 مارس فخدوهم في قال ايه جلسة لسماع اقوالهم عسى انهم يفيدو المجلس العسكري.. وهو المجلس العسكري هيستناهم عشان يعرف منهم الحقيقة؟ والمجلس طبعا سمع منهم ,فيعمل ايه المجلس... ؟؟؟ يعاقب الثوار على طول بعدها بشهر بالظبط في 9 ابريل....وبعده الشرطة تنزل ضرب في الناس اللي ف التحرير يوم موقعة البالون ومؤامرة العباسية الدنيئة اللي حاصرو فيها  المتظاهريين السلميين ,وبعده فض اعتصام 8 يوليو بالقوة ..... طب وده ينفع يا مجلس بعد ثورة؟... الثورة هي اللي قعدت المجلس في مكانه دلوقتي.. شرعيتهم من الميدان اللي انتهكوه مش مرة ده 5 مرات ... المجلس واخدنا على فين؟.. قمع وقهر جديد.. صوتنا بيكتموه تاني ولا ايه؟؟؟؟ ولما ناشطة سياسية وسط الضرب في العباسية واقصد اسماء محفوظ وسط نرفزتها وخوفها وسط الحصار اللي كانو فيه من العسكر المفروض تقول يحيا المجلس العسكري. يعيش طنطاوري للأبد؟.. اكيد ممكن تغلط... ولا هما استدعوها للنيابة عشان الكلام اللي قالته على تويتر بتاع لو مبارك متحاكمش متزعلوش لو في مليشييات مسلحة نزلت وخدت حقها بأيدها.. طيب ما بتوع احنا آسفين يا ريس قالو اوسخ من كده( لو مبارك حكمو عليه هنروح السجن نولع فيه) متبعتلهومش ليه بقىىىىىىىى ولا هو ايه بالظبط يا مجلس؟ انا ضد المحاكمة العسكرية للمدنين وضد محاكمة اي انسان مصري بيقول رأيه بحرية...وهنفضل نقول ونعلي صوتنا وصوتنا يعلى اكتر واكتر بالحق والعدل للناس كلها وهنفضل نتكلم لحد ما نعدلها يا نموت احنا بقى فيها وغيرنا يكمل ....واخيرا وكما قلت من قبل احب اوجه كلمة للمجلس العسكري... مش هنسكت انت تسكت... لا للمحاكمات العسكرية للمدنيين ...ولك الله يامصر

صفحة كريم مغاوري الرسمية على الفيس بوك (Like )

https://www.facebook.com/karimmaghawry25

حساب كريم مغاوري على تويتر ( Follow )

https://twitter.com/#!/KarimMaghawry1

قناة كريم مغاوري على اليويتوب ( Subscribe  )

http://www.youtube.com/user/Karimchata

مدونة كريم مغاوري ( عدسة كريم مغاوري)- (Join)

http://karimmaghawry.blogspot.com/