الجواب الماحي على حملة تشويه حمدين صباحي

الـجواب الماحي على حملة تشويه حمدين صباحي

-        اللي بيحصل دلوقتي على تويتر والفيسبوك ومواقع التواصل الاجتماعي كلها من حملة منظمة جدا لتشويه حمدين صباحي بيدل على حجات كتير جدا بس قبل ما اقول الدلائل ديه لازم اوضح ايه هي رؤوس حملات التشويه ديه طبعا هبدأ بالفلول بدأو في تشويه السيد حمدين بنشر فيديو وهو بيرقص في فرح وكاتبين عليه اتفرجوا على المناضل حمدين صباحي بيعمل ايه؟ممكن ده فرح حد قريبه او معارفه هو المناضلين مش من حقهم يضحكوا ويرقصوا وينبسطوا ولا هي حلال للناس كلها وحرام على المناضلين؟ ثانيا بعض تجار الدين من السلفيين ومش كلهم عشان في سلفيين بنحترمهم ونقدرهم جدا .. تجار الدين دول بقى كانوا بيدّعوا على حمدين صباحي أنه شيعي عشان قال انه عايز السياحة الايرانية تفيد الاقتصاد المصري فبقى كده الراجل شيعي .. طيب ما الامريكان والانجليز والفرنساوين بيجوا يسيحوا هنا اشمعنى الايراينين يعني ما تحوشوا اليهود اللي في طابا ودهب!! .نيجي بقى كده لعدد قليل من شباب الحملات الاخرى لمرشحي الرياسة بدأو في نشرا كلام وفيديوهات متقصقصة ومتلزقة بنفس اسلوب الفلول عشان يقولوا بيها ان حمدين صباحي كان بيساند نظام صدام حسين وبعض من الرؤساء  العرب والفيدوهات ديه اترفعت قبل الانتخابات بفترة بسيطة جدا يعني حركة مقصودة ومباشرة ولو كانوا اتفرجوا على الفيديو كامل كانوا هيلاقوا انه بيتكلم عن صمود رئيس عربي ضد الهيمنة والعدوان الامريكي ونسيوا ان صدام هو الرئيس العربي الوحيد اللي وقف قدام جبروت الامريكان مع اعتراف حمدين بديكتاتورية صدام حسين ونظامه القمعي هو والقذافي وبرضه مننساش ان حمدين صباحي رجع بالأسرى المصريين من هناك وبرضه الفيديو المتقصص اللي عايزين يقولوا فيه ان حمدين صباحي  بيساند جماعة القاعدة مع ان الفيديو الاساسي بيقول انا مع جماعة القاعدة في مقاومتهم للمحتل الامريكي للعراق فقط اصل يا جماعة لو في حرب بين بلد وبلد والمحتل نزل الشوارع اكيد البلطجي ممكن يتحول لمقاوم لأن برضه حياته بتتهدد وده عدو بلده كلها.. ده حتى لو في خناقة بين شارع وشارع بلطجية الشارع ده بيقفوا مع الناس ضد بلطجية الشارع التاني وكمان مننساش ان في بلطجية كانوا بيحموا شوارعهم وناسهم في اللجان الشعبية في الثورة.ويستمر عدد من اعضاء الحملات في مسلسل التشويه والتلسين والغلط وان حمدين صباحي فرصته قليلة وانه بيفتت اصوات الثورة مع ان الي حصل العكس وكان متفوق في وسط كل المرشحين برغم خروجه من السباق برضه وحتى بعد ما عليت اسهم حمدين صباحي بشدة بيستمروا في حملة التشويه وانه الاصوات اللي جاتله بالاتفاق مع المخابرات ! طيب انت كنت قاعد معاهم ساعتها مثلا ومدام المخبرات معاه مكسبش ليه من اول جولة؟؟ طيب اصل خيرت الشاطر دفعلوا فلوس في الحملة ,وهو خيرت يدفعلوا ليه وفي مرشح منافس من الجماعة ضد حمدين وكمان مخدتوش بالكوا ان الحملة فقيرة وان المؤتمرات كانت بتتعمل بمجهودات الناس اللي بتحبه والدعاية كانت اغلبها بالمجهود الفردي والتبرعات ,ده دعاية  حمدين صباحي كانت في مناطق كتير جدا مش موجودة بسبب فقر الحملة وديه حاجة متعيبوش بالرغم من اسهال الدعاية لمرشحين تانين ومحدش عارف فلوسهم منين؟ اما عن تحالف حمدين صباحي وحزب الكرامة مع الاخوان المسلمين في انتخابات البرلمان فكلنا عارفين ان الاخوان كانوا هيحصدوا عدد كبير من المقاعد وكان لازم يكون في تواجد بأي شكل من الاشكال لتيارات تانية عشان متبقاش المغالبة للأخوان لوحدهم وده منطقي في عالم السياسية التحالف التكتيكي الوقتي ده مفيهوش مشاكل عشان البرلمان يكو بيمثل الشعب مش جماعة بعينها وده اللي كان عايزه حمدين صباحي وهو مازال بيؤكده ان مينفعش الاخوان يكونوا لوحدهم في السلطة وتطول الحملة السخيفة ديه بنته سلمى صباحي اختنا وزوجة صديقنا اشرف حصافي وينشروا ليها صورة مع اشرف جوزها ومع زميلها اياد المذيع في نفس البرنامج على اساس انها وسط شباب في ميدان التحرير .. طب في سخافة كده وكمان اتهامها بانها شغالة في قناة يمتلكها احد رجال الاعمال الفلول .. ماهو كل الاعلام يمتلكه فلول هاتوا كده قناة يمتلكها ثوري؟ وهو المفروض ان شباب الثورة يقعدوا في بيوتهم والفلول يسيطروا بفلوسهم على الاعلام ولا يظهروا ويقدموا صورة شباب الثورة للناس وفكر الثورة واهدافها ... خلاصة القول ان اللي حصل ده بيدل ان هؤلاء اثبتوا ضعفهم باستخدامهم للأساليب الغير شريفة في حملة التشويه ديه قبل الانتخابات وبعدها وأنها زودت اسهم حمدين صباحي عند الناس ومأسّرتش في حب الناس ليه لأنه هيفضل ويستمر رغم انف الحاقدين  واحد مننا.


أين تجد كريم مغاوري؟

 صفحة كريم مغاوري الرسمية على الفيس بوك (Like )

https://www.facebook.com/karimmaghawry25

حساب كريم مغاوري على تويتر ( Follow )

https://twitter.com/#!/KarimMaghawry1

قناة كريم مغاوري على اليويتوب ( Subscribe  )

http://www.youtube.com/user/Karimchata

مدونة كريم مغاوري ( عدسة كريم مغاوري)- (Join)

http://karimmaghawry.blogspot.com/