إلى والدتي السيدة ليلى سويف

الصورة بعدسة كريم مغاوري9-9-2011

إلى والدتي السيدة ليلى سويف






انا اسمي كريم مغاوري .. ممثل ومخرج .... انا معرفش علاء شخصيا... ولا عمري اتكلمت معاه .... كان اول معرفتي بيه من خلال برنامج على اون تي في بلدنا بالمصري مع ريم ماجد الحلقة اللي راحت بعدها ريم هي وحسام الحملاوي عشان المجلس العسكري يدردش معاهم على حد قول المجلس ..... كان الكلام كالعادة حول انتهاكات المجلس العسكري بعد 9 ابريل للمتظاهرين في ميدان التحرير... بعدها اتقابلنا بس من غير ما نتكلم في اعتصام 8 يوليو ومليوينة تصحيح المسار وديه كانت آخر مرة اشوف علاء فيها وكان بيكون في فرق متر او مترين بيني وبينه بس انا كنت بفضل اصوره بكاميرتي اللي متعود اصور بيها عن اني افتح كلام معاه لاني كنت متاكد انه بيتكلم في حاجة اهم وبلاش اقطع الكلام ..... مكنتش اعرف اسمه خالص بس كنت دايما بشوفه في كل حتة ف الميدان وكنت عارف انه واحد من النشطاء السياسيين اللي بجد اللي بيشتغلو بقلب وضمير .. انا ليه بقول الكلام ده ... عشان اقولك ان علاء مأثر جدا فينا.... ممكن اي حد يختلف معاه في افكاره الشخصية ..... بس محدش هيختلف معاه في قضية البلد ورفضنا الكامل لتواجد المجلس العسكري في الحكم .... علاء بالبلدي دماغه منوره ولما اتعرفت عليه من خلال مدونته وافكاره ومقالاته لقيته حد بيحب الحرية لولاد بلده قبل نفسه ليه افكار كتير مهمة لو اتنفذ ربعها بس هيبقى في تغيير حقيقي في البلد واحترام من كل واحد للتاني .... كلنا متضامنين معاه واوعي تخافي انه يتأذي او يتسجن.... كل ده تهويش عسكر... عارفة ليه يا امي؟ لأن اللي جاي اكبر واقوى وعلاء عبد الفتاح وفادي الصاوي الل اتاخد في احداث 9-9.. والشهيد معتز انور شهيد الشيخ زايد وغيرهم الشرارة التانية لإكتمال ثورتنا...البركان قبل ما يثور بيكون ليه مقدمات. حجارة صغيرة مشتعلة وملتهبة... لكن اللي جاي ثورة البركان نفسها.... علاء هيحرر نفسه بنفسه على فكرة مش حد تاني علاء قضيته هتفجر مصر كلها وبعد الانتخابات متروح للفلول والمتأسلمين.. هتبقى الموجة التانية الاقوى والاكبر ... ثورة 25 يناير بجد وعلاء هيكون في اول الصف.. علاء اسمه في التاريخ اتحفر بالنور زي كل اسم في اسرتكو الكريمة ..علاء سجين سياسي.. بالرغم من ان ثورتنا ضد السجن السياسي واصحاب الرأي الا ان العسكري بيطبق قانون العزل السياسي على النشطاء والمدونين قبل ما يطبقه على فلول الحزب المنحل ..... بحاول افكر واتخيل اهلى ممكن يكون موقفهم ايه وحالتهم عاملة ازاي لو انا في مكان علاء ..... ؟ انا بحسدك على قوتك وصبرك... رغم اني عارف ان جواكي أسى والم ... وبكررها علاء خارج خارج وهيكون في اول صفوف ثورتنا الاكبر وده السبب اني بكتبلك الرسالة ديه مش عارف هي ممكن توصلك ولا لا بس انا حبيت اقولك على اللي في قلبي واللي انا حاسس بيه..... واحد من ولادك... كريم مغاوري

صفحة كريم مغاوري الرسمية على الفيس بوك (Like )

https://www.facebook.com/karimmaghawry25

حساب كريم مغاوري على تويتر ( Follow )

https://twitter.com/#!/KarimMaghawry1

قناة كريم مغاوري على اليويتوب ( Subscribe  )

http://www.youtube.com/user/Karimchata

مدونة كريم مغاوري ( عدسة كريم مغاوري)- (Join)

http://karimmaghawry.blogspot.com/