انا مسلم وعاوزها مدنية

انا واحد طول عمري بحب ربنا زي كل المصريين اللي بيحبو ربنا وبيعتزوا بدينهم واسلامهم.. لا عمري ربيت دقني ولا قصرت جلابية.. حافظ لجزئين من القرآن جزء عم وتبارك.. بنساهم شوية وارجع احفظهم تاني وتالت.... في سنة 2006 كنت ف سنة تالتة في معهد فنون مسرحية . وانا في الامتحانات بتاعت التيرم التاني جاتلي سفرية السعودية في الصيف مع المخرج محمد عمر مسرحتين هنعرضهم في الطائف اللي جمب مكة .. الاولى بطولة عمر الحريري وعلاء مرسي ومحمد لطفي والتانية بطولة حسن حسني وسامي مغاوري وفاروق فلوكس .... سافرت يوم 29-6 وكان يوم خميس وكنت لسه مخلص امتحانت فورا ....وصلنا السعودية الخميس بعد المغرب كده  وانشغلنا في التحضير للمسرحية ولحد يوم التلات وانا هموت واروح مكة اعمل عمرة ماهو انا قبل ما تيجي السفرية كنت بقول لأبويا مش هنعمل عمرة بقى قالي والله ياريت قلتله تعالى ننوي وربنا هيسهل.. واهو ربنا سهل وانا دلوقتي في السعودية وبيني وبين مكة نص ساعة بالعربية.. هفضل قاعد في الاوتيل كده؟ خليت المجموعة اللي معانا تتحمس وحددنا يوم التلات اننا بعد العرض الاول ننزل مكة نعمل عمرة وقد كان,احرمنا من الاوتيل وروحنا الميقات نزلنا على مكة ووصلنا الكعبة وودخلنا .....كان مشهد به من الرهبة ما به من الجمال والروحانية فانت في بيت الله عز وجل عايز انبساط ايه تاني ؟؟ وعملنا العمرة وكانت ليلة عظيمة فقد اصبحت معتمرا.. وتوالت العمرات في الـ 20 يوم الاولى عملت 5 عمرات منهم اتنين انا والفنان يوسف اسماعيل لوحدينا في جمعتين متاتاليتين وكانت عمرتين عظيميتن وكنت اشعر بعدهما بسعادة بالغة ثم في فترة الانتقال ما بين العرض الاول والثاني 5 ايام راحة في انتظار الوفد الثاني .. قررت اني لازم اروح ازور  سيدنا النبي في المدينة ديه كلها 600 كيلو يعني من القاهرة  لمرسى مطروح وعيب قوي يعني ابقى في السعودية ومروحش ازور الحبيب المصطفى صلى الله عليه وسلم .. قررت يوم الخميس بليل ان اذهب الى المدينة منفردا نزلت على مكة بتاكسي بيسموه دباب( عربية نقل صغيرة) بـ 50 ريال ومن مكة للمدينة ركبت تاكسي جماعي ب 50 ريال برضه ... وروحت على هناك 5 سعات في التاكسي تقريبا ووصلت قبل صلاة الجمعة وصليت الجمعة وصليت العصر بعدها قصر عشان انا على سفر ولازم ارجع بسرعة عشان الطريق طويل ولسه هعمل عمرة كمان في مكة.... روحت سلمت على سيدنا النبي مرتين وقرأت الفاتحة ثم اكلت من ماكدونالدز اللي قدام الحرم المدني مباشرة واتكلت على الله في طريقي لمكة واديت فريضة العمرة للمرة السادسة.. تاني يوم وصل الوفد التاني عم حسن حسني وابويا وفاروق فلوكس ومجدي ادريس يومين تلاتة وروحنا عملنا عمرة وكانت عمرة من طابع خاص لأني كنت مع ابويا اللي انا وهو نويناها سوا وقبل ما نسافر عملنا عمرة كمان وسافرنا عن طريق الطائرة للمدينة المنورة مرة اخرى واستقبلنا الاصدقاء هناك وكأن المدينة المنورة كعادتها تفتح احضانها وجبالها لكي تحتضني من جديد وشاهدت معالم المدينة وجبل احد ومقبرة سيدنا حمزة والبقيع واشياء عدة..... وكانت سفرة عظيمة جدا جدا جدا مباركة.. وفرقت معانا في حياتنا جدا الرحلة ديه لأنها زادت من تقربنا لله عز وجل .. بعد كل ده يجي واحد مربي دقنه ومقصر جلابيته بس.... ولا يعرف يعني ايه مدنية ولا علمانية ولا ليبرالية .. ولا عايز يتناقش ولا يعرف لحوار ولا ادب الحوار الا منطق الاستقواء ومعلق صورة بن لادن على صدره ويقولي انت كافر؟؟؟؟؟ الاسلام ليس هيئة وشكل ارحمونا بقى..... مدنية مدنية مدنية.. لك الله يا مصر

صفحة كريم مغاوري الرسمية على الفيس بوك (Like )

https://www.facebook.com/karimmaghawry25

حساب كريم مغاوري على تويتر ( Follow )

https://twitter.com/#!/KarimMaghawry1

قناة كريم مغاوري على اليويتوب ( Subscribe  )

http://www.youtube.com/user/Karimchata

مدونة كريم مغاوري ( عدسة كريم مغاوري)- (Join)

http://karimmaghawry.blogspot.com/