الخميس، 5 أبريل 2012

وش نضافة....الحقيقة لازم تتقال...... شهادة رقم رقم 1 (عن قضية طارق النهري )



وش نضافة


الحقيقة لازم تتقال...... شهادة رقم رقم 1 (عن قضية طارق النهري ) 


ليه طارق النهري يتمسك دلوقتي في التوقيت ده بعد اكتر من 4 شهور من احداث مجلس الوزرا؟؟؟؟ 
اولا اتفرجوا على الصور ديه ... اثناء وجوده يوم معركة الجمل في ميدان مصطفى محمود وبيهتف للمخلوع بقوة وفي فيديو في نفس المدونة ليه بيقول كده (وثائقي غن موقعة الجمل بالاسفل)















الثورة نزل فيها فنانين شرفاء وحقيقين وكانوا كتفهم بكتف الشعب المصري وزيهم زيه.... من اول يوم لحد النهاردة في فنانين ثابتين على موقفهم انهم ضد النظام.. لكن للأسف في فنانين في تاريخهم اصلا كلام كتير على شغلهم مع الجهات الامنية... كلامي واضح.. وعندي كلام كتير جدا على موضوع قضية طارق النهري اللي انا ومحمد زكي مراد (ميشو ) ومجموعة اصدقاء خرجناه من ميدان التحرير في احداث محيط وزارة الداخلية.
اولا انا شفته يوم 28 جمعة الغضب على كوبري اكتوبر بينظم المرور على الساعة 3.. لقيت له فيديو على اليوتيوب وهو تعبان وبيتشاهد ومعاه ظابط ب 3 دبايبير وهما بيفوقوه (لينك الفيديو)  واستغربت جدا ان ظابط ويوم الغضب بيفوق مواطن لأن العنف من ظباط الاخلية كان عنيف يومها




معنى كده انه شاف الناس وهي بتموت وبتتخنق يوم جمعة الغضب من الغاز والضرب بالخرطوش...
بعدها يوم موقعة الجمل كان موجود مع مؤيدي مبارك وبيقول " مفيش مركب من غير قبطان والريس هو قائد المركب احنا عايزينه "
لينك الفيديو واتفرجو من الدقيقة 14

http://www.youtube.com/watch?v=Tn3PWGruoo0
وبعد كده العودة للميدان مرة اخرى على انه ثوري ومناضل عشان يخش وسطنا
بعدها وفي يوم 8 ابريل اللي هجم فيه الجيش على الميدان كان بيهيج الناس على انهم يروحو شرم الشيخ عشان يجيبوا المخلوع في اليوم ده ليه لقاء واتفرجوا على الفيدو ده ... واتقالنا بعدها ان في فنانوبيقف مع شباب وبيتصرف تصرفات غريبة وبيهيجهم


http://www.youtube.com/watch?v=hDlG8Tft6NY

نيجي لأعتصام يوليو بعدها
وتحديدا موقعة العباسية ... محمد القصاص او محمد على -اللي كان منتحل شخصية صحفي وكان بيتردد على خيمة ائتلاف فناني الثورة وعرفنا بعد كده انه تحريات عسكرية ومسئول عن التبليغ عن فناني الثورة وعن اتحاد شباب ماسبيرو واللي سجل له اعترافه ائتلاف شباب الثورة (اسلام لطفي) -قال ان مروحتش موقعة العباسية...بالرغم من ان القصاص رجع المفروض انه متعور يومها وكان بيسنده طارق النهري تحديدا وبيحكي عن اصابة قصاص؟؟؟؟؟ مع ان قصاص اعترف بعدها انه مرحش وديه كانت تعليمات الظابط .. وزميلنا الفنان احمد ابراهيم يشهد انه مشفش طارق النهري هناك في مسيرة العباسية طيب ايه يا جماعة... حد يفهمني.. .
وقبل فض اعتصام يوليو بيوم وتحديدا السبت بليل قبل يوم فض الاعتصام وبعد ما قرر الائتلاف انه يغادر الميدان جه واتكلم معايا اننا لازم نغادر الميدان.. نص ساعة واحنا بنتكلم في اجتماع جوة الخيمة قال " لا انا لايمكن اسيب الميدان واخون اهالي الشهداء" تغير موقف ورط بيه مجموعة مننا عشان يتلموا تاني يوم الصبح وهو خلع اساسا ومكنش موجود

بعد ماجالي الفيديو بتاع موقعة الجمل كنت لسه شاكك ومتوتر وخايف.. في ناس مقربة منه وريتها الفيديو بدأو يبعدو عنه ويحكولي عن حجات غريبة
1- انه حاول يسلم شاب اسمه سامي من مجموعة الالتراس دخلت رصاصة في رجله وبعد ما اصحابه ودوه مستشفى الهلال لقوا بوليس وامن هناك فهربوا على المستشفى القبطي وكان طارق معاهم ولقاو في بوكس ماشي وراهم.. وان طارق كان كل شوية بيعمل تليفونات غريبة ويبعد عنهم ومُصر ينقل سامي بعربيته .. وكان بيصر انه يعرف الاماكن اللي الشباب بتسكن فيها وعنواينهم...
2- ان بنت جت اتخانقت معاه مرة قبل كده في الميدان عشان كان هيسلم الله يرحمه الشهيد رامي الشرقاوي مصمم الجرافيك على انه بلطجي وكانت خناقة في شهود عليها...
3- الفنان المخرج حامد سعيد شافه اكتر من مرة بيدخل ناس شكلها غريب جدا وبلطجية جوة الميدان وبيحركهم وراه في عز الازمات.....!!!

الرسالة التانية هيكون فيها شرح كامل وافي لكل التفاصيل ديه وزيادة عليها كمان شهادة الشهود.. رسالتي اننا كفنانين لازم نتخلص من كل شيء ممكن يشوهنا.. مش هتلكم عن القضايا بتاعتو قبل الثورة.. مش هقول انه اخوه حمدي النهري ظابط كبير في الداخلية اساسا.... مش هتكلم على ان الامن كان مخترق صفوف الفنانين بالناس ديه لكن هبوس ايديكم متعملوش حد بطل على حسابنا والسؤال المهم جدا اللي بكرره

ليه طارق النهري يتمسك دلوقتي في التوقيت ده بعد اكتر من 4 شهور من احداث مجلس الوزرا؟؟؟؟
الاجابة عشان يتعمل بطل ويخرج نضيف تاني بعد وش نضافة متين ويبقى وسطنا ويتم استخدامه لحجات احنا لا شايفنها ولا عارفنها... يا اهل الفن ارجوكم لازم نطهر نفسنا بقى .. ومش عشان فنان نقف جمبه وهو بيضر الفن واهل الفن وبيشوه الثورة



صفحة كريم مغاوري الرسمية على الفيس بوك (Like )

حساب كريم مغاوري على تويتر ( Follow )

قناة كريم مغاوري على اليويتوب ( Subscribe  )

مدونة كريم مغاوري ( عدسة كريم مغاوري)- (Join)

 

ليست هناك تعليقات:

إرسال تعليق